søndag, mars 05, 2017

Griseslakt




No er det altfor lenge sidan det har vore eit innlegg om griseslakt
på bloggen her. Nærare bestemt to og eit halvt år sidan! Dei som har 
følgt bloggen hugsar nok godt griseprosjektet mitt i 2014. Og at det 
var slik eg byrja å bli kjent med grisebonden min. Han var med og slakta
Gissen og Gossen, eller rettare sagt så var eg med han. For slikt er det
greit å lære seg opp i. Me hadde fleire utegrisar her i fjor og planen var
eigentleg å slakte ein av dei heime. Men det var travle tider då og
alle vart sendt med slaktebilen og vart selt som kjøt for Fitjar 
Gardsmat. Så me har ete både pølser og bacon og svinesteik 
frå dei flotte utegrisane, utan å ha gjort noko sjølv. Men jommen byrja 
det å bli tomt i frysen her og bonden fekk det plutseleg for seg at me skulle
ta ei griseslakt etter gammalt. Vêret var nydeleg og det var berre å sette i gong!


Grisen vart avliva og tømt for blod. Deretter vaska så rein som muleg
og lagt på eit enkelt bord. 


Forskjellen på slakt av andre dyr og gris. Her skal det skåldast. 
Me legg handkle eller tøystykke over eit område og hell på 
kokande vatn. Tøystykket held på varmen ei lita stund og gjer
at det er lettare å skrape vekk det ytterste laget av huda. 


Og så er det berre å skrape. Samekniv er supert for dette,
men eg veit det finst gode skraper for føremålet også. Nokre
stader lausnar busten greitt, andre stader må ein jobbe litt
lenger og kanskje helle på fleire rundar vatn. 


Etterpå ser grisen "naken" ut. Så er det å legge den på rygg
og starte med snittet over brystet. Fyrst med kniv og deretter
sag for å dele ribbene i to. Forsiktig slik at ein ikkje kjem borti
mageinnhaldet. 
Deretter skjær ein ut ei sene på kvar bakfot til å henge opp
grisen med. Så må ein skjære av halen og lausne endetarmsopninga
slik at den kan tas ut heil og fin og ikkje forurenser kjøtet. Dette er viktig
å gjere forsiktig og i rett rekkefølge. 


Så er det å forsiktig sprette opp magen og tarmar og magesekk
vil velte ut. Det er greit å ha ei trillebor eller anna å tømme
dette oppi for dette er skjøre saker. 


Her kjem lunger og lever og anna av innvollar. 
Levera skjærer me av og tek vare på i ei balje 
med vatn. 


Så går ein inn og lausnar ut hjartet. Det tek me også vare på. 
Nokre snitt i det for å rense ut blod vart også gjort. Hjartet også
skal lagrast i vatn. Så er det å løsne spiserøret og å skjære 
av hovudet. Vaske ein runde til med vatn og så skal heile
skrotten henge ei stund. 


Buster fekk vere med som publikum og kjente på gode
lukter under slakteprosessen. Til slutt skjærte me av øyrene 
som han fekk servert til stor glede. 


Og eitt døger etter har han jobba iherdig med griseøyrene og 
dei ser likeeins ut. Men han storkosar seg med "fangsten" sin. 
Så no gjenstår det partering og laging av bacon! Denne runden
kjem me nok ikkje til å nytte absolutt alt av dyret og eg kjem ikkje
til å lage spekeskinke. Det sparer eg til utegrisane våre. Men det
å kunne lage ekte bacon til å ha i frysen er stas. Det er nok av røykearomafylte
baconskiver til 200kr kiloen der ute i butikken! 

1 kommentar:

  1. Dette kan dere, helt tydelig. Det ser veldig lovende ut for kommende matopplevelser. Og hvem visste vel at slakting var like bra som Tinder? (",)

    Håper du lager ett innlegg eller to om baconet også.

    SvarSlett

Kjekt om du legg frå deg nokre ord!